الأرق

قصيدة بالعامية المصرية

جالي نهار و مجاليش نوم

في عنكبوت في سقف الأوضة

بيسرق من جفوني خيوط النوم

و كأنه خياط .. بيلضم اليوم في اليوم

ورا بابي الكل مستني

الماضي بيجري ورا مني

و بكرة بجري ورا منه

و الخاسر يومي

إتغربت انا عنه

بننام فبنحلم .. و أنا بحلم أنام

لا قادر أبص ورايا

ولا لقدام

بخاف من ذكرى

و بخاف من بكرة

و بخاف المستقبل ميستقبلنيش

يديني ظهره ... ميستناتيش

و كأني أنتيكة خايفة تتحط ع النيش

يوماتي موال الليل و الويل

و راسي ع المخدة

مهدودة الحيل

اليوم بتفتكره عدى وهو مستنيك

بذكريات تخليك تنده ع النوم

انا فين ألاقيك

وشوش الماضي بتكسبني

و آمال في بكرة بكسبها

و انا نفسي النوم يغلبني

يشتاقلي ... يفتكرني

فشلت أصحى

و فشلت أنام

فشلت أحلم

و أحقق الأحلام

و في وسط الأفكار

بينتهي الإنتظار

و يرن المنبه

ينبه المنتبه

ببداية يوم جديد